 موقف لا احسد عليه
زمان يوم كنت في الإبتدائية تقريباً بالصف الرابع اخويا الكبير كان وقتها بصف اولى متوسط يبغى يروح عند خطاط عشان يسوي وسيله وقلي تعال معايا (على فكره هذيك أول مره نفكر نروح فيها عند خطاط ) وإن شاء الله آخر مره من دون شر وياليتني ما رحت. المهم وحنا في الطريق رايحيين انا واخويا كنا فرحانين ورايحين جري يمين ويسار ومن بين السيارات ، حتى فاكر وقتها اخويا وهو مصفي الطبلون جااااري دعس على ديل بسه ( عري يابس كأنه ممسوك بالكهرباء ) المهم كملنا الجري وفي الطريق حصلنا ثلاثة من بنات الجيران وحده منهم قلك كانت مسوية حركات هي واخويا وكان شكلهم اهبل . قالوا فين رايحين قلهم اخويا ( وهو مسوي فيها قدامها ) والله رايحيين عند الخطاط تعالوا معانا . مشينا لين ما وصلنا عند الخطاط واحد سوري الله يعطيه العافية ما ابغى ادعي عليه لانو جابلي الفجعه . كان جالس على الكرسي ، وكانت فوق المكتب المروحه اللي تدور . قلو اخويا ابغى اسوي وسيله لخريطة المملكة ، قلو طيب قلو اخويا كم تبغى ( دحين اخويا مسوي فيها قدام البنت ) قلو الخطاط اللي تجيبو قلو اخويا يعني كم قلو يا ابني اللى تجيبه قلو اخويا هيا خذ ( اتخيلوا كم اخويا اعطاه ) ............ اعطاه ريالين ... ما مد اخويا يده إلا وتعالوا شوفوا قام الخطاط من فوق الكرسي ومسك المروحه ( وهي لسا تدور ) ويرميها علينا اطلعوا برا يا كلاب .. ووالله ادور الجماعة اشوفهم وين كل واح يسبق الثاني ( اولهم اخويا ) وشفت اشكال البنات وهما طايرين اللي مسويه شعرها ظفيرتين وطايره مع الهوا وانا وراهم وكل ما مشيت شويه اشوف فردة جزمه ( الله يكرمكم ) وحده على الرصيف ووحده في نص الشارع ، المهم وصلنا عند العمارة وأنا لسا جااااااري من عندهم ماني داري إني قد وصلت بس بركه اخويا الحبيب انتبهلي وزهمني والا كنت مطول سيدا ما دري على فين كنت بروح من الفجعه اللي لقيتها . ما عرف اخويا كيف يطلع من الموقف الحلو قدام ابو ظفيرتين ، قلي كيف تقلي انه بريالين وهاتك يا ضرب فيني ( وانا ما كنت ناقص )
وبس حبيت اشارككم ذكريات الطفولة الحلوه
جعل ذكرياتكم الحلوة ما تزول
المـــداوي ...  | 
19-02-2006
العرض العادي
