هآآي
ـآخبآركم ..؟؟ علومكم ؟؟<< علومكم ولـآ ريآضيآتكم << يتميلح ..:d

ـآلموهم ..

مدري وش جاني فجأة إلا أنزل موضوع اليوم ما مسكت إلا هالحزه,,

هو بربسه وحواق بس ذي بروفه بأختبر نفسي إلى الحين وانا اعرف أعبروإلا لا,لان آخر خبري بالتعبير أيام الثانوي ..<< يقآله كبير ..





[1]
شمس ساطعة , تمد أشعتها الحارقة على أرجاء هذه القرية الصغيرة ,بيوت متلاصقة تحيط بها المزارع الصغيرة
في هذه الأثناء ,كانت الأسرة تجتمع حول "الحصير " ويتناوشون على مائدة الافطار الفاخرة المكونه من خبز أم علي, وطحينية وبيض مسلوق طازج..
أبو علي : حصيصه أميّ دوتس هالخبزه كلي من خير ربي
حصيصه: هذا أنا أكل يابيي ,كل انت لا يآكلون الصحون هالمشافيح

محيميد وصويلح مطأطأين الروس :محيميد وهو مالي خشته : من المشافيح يا الدبه !!هاااه
أبوعلي : أقول ورا ماثنثبر أنت وتنطم وخلك في أكلك ,
وأنت (ويلتفت على صويلح ) عجل بعد ,موب مثل أمس ماهنا صبي ما خليته يطارد وراكم يناديكم
(وكعادتهم كل يوم ),قام الأبو وتوكل على الله ولحقه عليان ,وإذا بصويلح ومحمد يقومون على حصيصه ويدبغونها ويمسحون بها الأرض وهي تصايح ولكن لا مجيب , أمها في المطبخ وأخواتها المعرسات في بيوتهم ومنيّر فوق السطح والفعصه سعيدان عند الدجاج مع بزارين أخوه علي , ونوره مره علي في بليس <<عاد مدري وين طست سلكوا
وبعد أن اشبعوها ضرباً ,توكلوا للمزرعه بسرعه ,وقعدت هي تندب حظها العاثر وتزين جدايلها وتنفضها من ذا الغبرات ,وإذا بأمها الحنون العطوف تناديها , وش فيتس ؟ وإلا مثل العاده متجالدة مع أخوانتس!الله يصبرني عليكم ,الله يآخذني ويريحني فالجنه أبرك من الدنيا ومافيها
حصيصه عيونها تغورق وتحاول تحتسي لكن لامجال وبرطمها بيوصل ركبها من قو التعبّر <<<ولابرطم بعير وإذا بكومة خلاقين بحركه صاروخيه تصقع في وجهها البريء الدبي ذو الخدود الحمرا,خذي نشري خلاقين أبوتس لابركة فيه ولافيكم
وخذي صحن ذا العيش انشريه في السطح ونادي منير التسلبه ,أنا داريتن انها منحاشتن عن الشغل وخايستن في فراشها حسبي الله وهو نعم الوكيل
وينعاد موال كل يوم في حياتها... بخطوات متثاقله ودموع ٍ رقراقه خذت عفشها وراحت فوق وتناقرت مع منيّر شوي عشان تنزل لأمها,ثم بدأت في نشر الخلاقين وهي تحلطم في نفسها وتسب وتشتم في كل من هو على وجه المعموره (اففففف الله يآخذكم ,حسبي الله عليكم ,وإلا ذا الام شايفتني حمار مكده !! غسلي ,اكنسي زيني ذا اهئ اهئ ياربيييييييييييه ليش منب مثل هيله بنت هييّا كل اليوم أمها تسير بها معها و تقعد تلعب صقله , وإلا تحوس مع ارنبها في حوس الدجاج وفي الليل تقعد أمها تمشط شعرها وتزينه وتقص عليها وتدلعها وأنا لاااا ,وينك يابيي بس ما احب إلا أنت ...)

وبينما هي في تحلطم وتنشر لمحت شين على سور السطح والحمام حوله وراحت تشوف وشو من اللقافه ولقت حلاو صعو شكل منير موزيته لاأحد يآخذه ومير انها تشقق من الفرحه وتآكله وهي تآكل خانها الطرف وطلطلت على تحت وقعدت تتفرج على مزرعة جيرانهم وأبو الجيران وعياله يشتغلون فيها مادروا عنها ,وكان دحيم الفتى المغوار ذو ال 19 ربيعاً <<< ربيعا!ل60ذا طباخ الرطب تخب عليه خخخخخ -منسدح تحت نخله وفي يده نبيطه يتويقع على الحمام والعصافير وإلا والله يلمح زول فوق السطوح من ضمن الملامح جدايل محيوسه وسعابيل تقوطر وتعلج ..

وينقز يتعدل في جلسته يدقق النظر ماااش يغمض ويرجع يفتح ,ويعرك عيونه يشوف هو صدز وإلا خيال<<<مثل حركة أفلام كرتون يعني
واذا بالضحكه الخبيثه تنطلق من بين شفتيه ويناظر حوله ويلقى تمر صقعي حوله عقب قهوة ابوه ,ويلقط تمرة ويضعها في احضان النبيطه ويرسلها صاروخ ارض جو لسطح بيت أبو عليان وإذا بها تشطف كشة حصيصه وينتهي بها المطاف في جنب رجلها ,طقتها البوهه تناظر اللي حول رجلها وترجع تناظر تحت واذا بالاعين تلتقي ويطلق لها غمزه -ولا غمزة أكبر داشر بالتحليه- , ثم يطلق ضحتكه السنمائيه ويلف متجهاً نحو البركه ,وفي الطرف الآخر.. حصيصه .. بعد علامات البوهه والتعجب يغشاها حالة ضحك هستيري وهي تسترجع الموقف ,وتآخذ التمره تمره حبناوتمسحها في طرف دراعتها وهووبا عالخشه ,,وكان يوماً مختلف في حياتها ,,
بينما هي في حالة علج ,تسمع صوتاً مدوي
حصيصااااااااااااااااااه

[2]
بعد صلاة الظهر حصيصه تدخل الغرفه وتطل بوجهها الصبوحي في المرايه اللي ملصقه في الجدار ب"سمنت"
وتلعق يدها وتلصق شوشتها وتتأمل نفسها بدلع وتبتسم وتقول(ربي يحرسني من العين)علي :حصيصه
هي:نعم ,
روحي عاوني امي
شالة الصحن المليان رز وتوجهت به للسفره
الابو: هلا هلا ببنيتي !
تلطخ الصحن وتحب راس ابوها :شلونك يبه
صويلح :شوي شوي كسرتي الصحن جعلتس الكسر اللي مايجبر ,عاد وش تآكلين فيه اذا انكسر يالدبه
محمد : هههههههههه
الابو :وراكم على اختكم هاه
تمسك طرف جديلتها بحركه كلها دلع يقوطر وتلف وتتجه للغرفه
الابو : حصيصه ماعليتس منهم تعالي بس ياميمتي
تلف وأيضاً بكل دلع وأنوثه وضحكه متوزيه لايبه كلوا انتم عليكم بالعافيه ,أنا ما اشتهيت
[3]

دحيم بعد ماتغدا وملى هالبطن ,قاعد بفنيله وصروال منسدح في بطن الدار وحاط يده تحت راسه ويده الثانيه ممدوده عالمسنده ,ورجليه رافعها عالجدار ,وقاعده يسترجع اللي صار له مع حصيصه الضحى
(يووووه والله ان ذا أم دراعه حمرا عليه خدوود ماشاء الله ,, يوه من تصير ذي !! اكيد بنت ابو علي يالغبي .. ايه صح بنته ,,لاتطلع مرة عليان بس !! لا لا ماهقيته مرة عليان وش يطلعها فوق ذا الحزه !!
يووووووووووه بنته خلاص ,, بس وش اسمها !! وأي وحده !! )
فجأه ..
...دحيم ووجع يالأصقه ماتوحي وبعد هذا اليوم ....
ازداد التمر الصقعي في الهطول على سطح ابو علي هالضحويات ,,وزادت حمرة خدود حصيصه <<بلا والله هالتمر اللي تدغ منه كل يوم , وزاد انشغال الاثنين وكثر تفكيرهما ورومانستهما اللي تقوطر ونما حبهما
وبينما هم كذلك ..
وذات يوم حصيصه تويدز من ورا الباب تحتري جارتهم مره مشعان تدخل واذا بقلبها يرفرف فجأه وتلمح زول قد اعتادت أن تراه لكن ...من زاويه اخرى ,من على السطح ,نعم انه دحيم ,وتلاقت الأعين وتوقفت الحياة في نظرهما عدة دقائق
ثم تحركت الدنيا لان ام مشعان قطعت عليهم واذا بغمزه خاطفه واشارة من دحيم بمنعى ( اذا دخلت هالبقره طلي ثانيه )
وفعلا حصل اللقاء ورجعت تفتح الباب واذا ب أطخمها يتميلح عند الباب وينفض غبار ثوبه ذو اللون البيج
وهي بدراعتها الزرقاء الداكنه مطلعتن نص وجهها من ورا الباب
ويجي يوقف على جنب
دحيم وهو يسبل عيونه :وش اسمتس ؟
حصيصه وقد ذابت في مكانها :حصيصه وبعض الاحيان حصه
دحيم :حصيصه ياشعرة جوفي أنا دحيم ولد جيرانكم ولد جهير أسرع
حصيصه وهي ملصقتن عيونها بلأرض هه ههه <<<بشويش
واذا بدحيم يدخل يده في جيبه ثم يطلعها ويمدها :خذي بسرعه هذا لتس
يالله مع السلامه
صكت الباب وتسندت عليه <<<لقطه من مسلسل مصري ,فتحت يدها وناظرت وعيونها تغورق
واذا بمصاقيل في قطعة قماش مصنقه,لكن على قلبها زي العسل
ضمتها لصدرها وهي بتشقق من الوناسه ثم قعدت تشمشمها –وما اخفيكم سراً انها بغت تدوخ من قو الريحه الخايسه -



[4]



زادت اللقاءات والطلطله من ورا البيبان وكثر التميلح , و ..... انفضح حب دحيم وحصيصه , دروا العائلتين بهذا الحب العذري .. !
وصارت منيّر تسبق حصيصه للسطح عشان تطل وتشوف حبيب اختها لكن الطرد هو مصيرها
"وصاروا عيال الحاره يذبون على دحيم كل ماشافوه "العاشق الولهان "
صارت ام علي :تكرف بنتها زود وهي تقول :ايه بكره يجيتس دحيم ويآخذتس من عندنا وهي تغمز وتضحك لبتتها وصاروا اخوانها بالمثل وهي تكتفي بالحياء والابتسامه >>>سقى الله أيام المنافخ إلى أن جاااااااء يوم و.....سيرت عليهم الضحى ... جهير أم دحيم
وبعد السلاام والكلام والحش والتقهوي
أم دحيم : أقول يا أم علي فيه شين ودي أقوله لتس وتبتسم وتناظر حصيصه
ومن الحياء حمر وجهها وارتعدت اطرافها وعرقت يديها وقامت وهجت لسطحها الجميل وخلت الحريم يشوفون شغلهم
وبكذا خطبت ام دحيم حصيصه لولدها دحيم وقالت ام علي : بنشوف راي البنت – وهي تسذب على عمرها وعلى الحرمه لانها داريتن عن راي بنتها وقاضيه- وراي ابوها طبعاً .



[5]

كلووووووووووووووووووووووشش


مباركين عرس الاثني ليلة ربيع وقمرااا,,ألف الصلاة والسلام عليك ياحبيب الله محمد
^
هكذا كانت تطربهم أم عبيد في تلك الليله وهي تدق بدفها لتعلن زواج دحيم وحصيصه "على سنة الله ورسوله



((( بعد 30 سنه )))
العنود :فاتحه الدريشه وفاتحه اللاب توب عشان تلقط اتصال من بيت عمها اللي جنبهم
يووه وراهم حاطين باسوورد اليوم !! بدق على هند تعلمني, يارييييييه متى يجون ذاا لاتصالات ويركبون الدي اس ال ويفكونا الله يآخذهم حشى نطرّهم
وذي وش فيها ماترد !!خل أناديها مع الدريشه
هن....
فيصل بابتسامه عريضه يدقدق بالكورة في ساحتهم : تبين هند !!نايمه تراها
تصقع بالدريشه وكل علامات التعجب على وجهها والضحكه تعلو محياها
ترسل لهند" ياحيوانه قومي بسرعه وعطيني الباس ابي اشيك على نتايجي "<<ياعمييييري

رساله وارده=1
ردت ردت ..ورا ذا الحمار يقول نايمه !!مسكين
" الباس ********

المره الثانيه لاتطلين أخاف يشوفك أحد ثاني ههههههه

العنود بشهقه قويييه : ياويليييي وش ذا لأ لأ مش معأول
ياربييييه وش اسوي

طنطن طنطن <<تخيلوا نغمة رساله
رساله وارده = هنيد في سابع نومه وجوالها بالصاله فقمت بالواجب يا الحراميه


بعد 6 أشهر ..
العنود فاتحه الدريشه وكل شوي تآخذ طله وهي قاعده ترتب غرفتها وتضحك بينها وبين نفسها فجأه دخل دحيم أبوها>>ايه ايه ماغيره
وش تسوين يابنيتي ..أرتب غرفتي
وشوله فاتحه الدريشه !! شوي ويجي الغبار ويقترب من الدريشه ليصكها لكن ...

يحصل مالم يكن في الحسبان!
توقف دحيم عن صك الدريشه واحمرت عيناه وقطب جبينه والتفت على العنود
العنود بكل علامات تعجب الحياة ةالدهشه وكل أبو شي تناظر أبوها
دحيم بكل غضب الحياة ::عنييييييد طررررررررررراخ كف
والله لأوريكم انتي وفيصل التسلب ..صوت صقعة الباب ومن ثم التقفيل بالمفتاح
لقد رأى دحيم فيصل وهو يناظر الدريشه ويصفر نغمة موبايلي حقت سعد الحارثي وهو يلعب بميداليته <<ياقدميييييي ركضت العنود للدريشه وهي الدموع اربع أربع
وشافت فيصل والخشه عالاخر شوي ويطلع اللسان والعيون بعد من كثر التعجب وقالت بكل تثاقل وهي تناشق من الصياح ومدت يدها :رح رح ابوي بيجيك ,,
ناظرها نظرة ترجي وغمضت وطاحت دموعها وهي تهز راسها بالايجاب يعني ايه انحش

فيصل حط رجله وهج بسيارته
دحيم ماشاف الا غبرة السيارة ورجع وهو يحلطم ويتوعد
دخل غرفته وقعد عالسرير وهو منزل راسه
انفتح الباب رفع راسه يشوف من ! دخلت ست الحسن والجمال أم خالد حصيصه
ارتاعت ..خافت زوجها ,حبيبها, شعرة جوفها دحوم"دحيم " وش فيه !!
قعدت جنبه بكل هدوء ومسكت يده ,رفع راسه وتلاقت عيونهم
حصيصه : وش فيك ياحلالي !.؟؟ عسى ماشر خوفتني
قعد يتأمل بوجه ام خلودي ,,حصيصه : تكلم وش اللي صاير
نزل راسه ثم قال بكل خيبة أمل : العنود
حصيصه بكل روعة الحياة (روعه اخت التعجب والخوف موب الشي الجميل بنتي وش فيها !!
دحيم : شكلها تحب!!
حصيصه : هاه !! وش تقول أنت
دحيم :تحب ولد عمها
شرح الموقف لام خالد بكل التفاصيل ,وأنه قاعد الحين يحتري فيصل عشان يوريه الشغل
سكتت حصيصه شوي وهي منزله راسها :ثم فجأه ابتسمت والتفتت على دحيم .. حصيصه بحياء : تذكر!!
دحيم :وشو!!
حصيصه: يوم ... يوم نسوي زيهم !! وتشطفّني بالتمر!!
دحيم وهو يقوم :هههههههههههه
يالله بس بأروح أجلدها دزليلة هالحياء
وكان يوماً مختلف في حياتها<< قليلة الحياء طالعتن على أمها

إخراج : عامر الحمود <يخسي ويعقب
آخرآج : تروكي طآل عمره


يلـآ آبي رآيك آلله لـآ يهينكم ..