اضع بين يديكم هذه القصيده راجياً ان تحوز على رضاكم


جــــــــاها قضـــــــاها

جاها قضاها ضحى الاثنين وهي قبالــي
ودكتورها بجنبها عجزان يداويهــــــــــا

ثم التفت لي وقال دكتورها حالــــــــــي
بيننا الموت ومن الموت محد ينجيهــــــــا

هو كاتب الموت لخلقه اول وتالـــــــــــي
وحق على كل نفس يوم يفنيهــــــــــــــا

ومالك سوى تطلب الواحد العالـــــــــــي
لامك نعيم بالقبر وبالجنة يجزيهـــــــــــا

فقلت ما اعترض على القدر ومالـــــــــي
غير رجوتي في رحمة الله لامي ابرجيها

وبرجيه من شي بصدري يوم اخوي قالي
عليها بنصلي العصر وللعود بنوديهــــــا

وساعة وصلنا قبرها من العين عليه سالي
دموعاً حزينه كنت انا اول اداريهـــــــــا

والموت يومه نزل بقبرها خالـــــــــــــي
ويقول على مهلكم يالله عطونيهــــــــا

ويومه طلع من قبرها قال يارجالــــــي
هلو عليها التراب نبي نغطيهـــــــــــــا

وحين انتهوا من دفنها قلت لمن حولي
ادعوا لها الله عليها راضي ويرضيهـــا

وبرجيه انا لمن موتها ضيق لي البالــي
والعين من افراقها دوم تبكيهــــــــــــا

وياما من افراقها كم مرة جالـــــــــــي
في لذة النوم طيف امـــي واناديهـــــــا

وافز من غرقت منامي واصيح بالعالــي
واقول ول يالموت خذت الروح وغاليهـا

وتركت فيني الحزن ليمن براء حالــــي
وياطول ليالي عشتها والحزن كاسيهـا

وفي وسط قلبي نيران تشعل اشعالـي
ونفسي على طاري امي الموت حاذيها

وياما وياما سهرت والدمع همالــــــــي
ابكي فراق اللي بعمري منيب ناسـيهـا

وشلون ابنسى من بقلبي قدرها عالي
والناس من افعالها والله تغليهــــــــــا

ولا هيب من اللي همها توزع اقوالـــي
وفي كل مجلس عيوب الناس تطريهـــا

وما اذكر بيوم مشت بالقيل والقالـــي
والشاهد الله النميمه ماتسليهــــــــــا

والختم ابدعي مغير الحال بحوالــــي
عن الذنوب والخطايا امي ينقيهــــــا



وسلامتكـــــــم


وتقبلوم فائق احترام وتقدير


طااااااااال السفرررررررررر

إن للشعر معاني وإبداع وإلا فكيف يصبح الشعر مميزا
ومثل هذه الابيات تلامس النفس وتبكيها ليس كونها رثاء للأم التي تمتلك سويداء القلوب

و حسب بل لأني أرها وصف لحالنا عندما نأول الى مثونا الأخير
فاللهم اغفر لنا ورحمنا وغفر للوالدين ورحمهما واسكنهما فسيح جناتك

ولك اخي طال السفر كل التقدير والاحترام على هذه القصيده العذبه وفي اتظار جديدك

صح السانك ..وسلمت اناملك..وسلم قلبك
احيك على ابداعك..
مودتي لكل من تذوّق بنقاء المشاعر وصدق الحروف

فاللهم اغفر لنا وغفر للوالدين ورحمهما واسكنهما فسيح جناته

اخوي الغالي

طال السفر

ماشاء الله عليك

تخلق من الحرف ابداع القصيد

قصيدتك في منتى الروعة

انسمجت مع كلماتها وتأثررت بمناسبتها

صح لسان وجاد بيانك على القصيدة الجزلة

الله يسلمك يارب

والله يرحم أمك ويسكنها فسيح جناته

ويغفر لسائر المسلمين يارب